Umferð á höfuðborgarsvæði jókst um rúm sjö prósent í júlí
Metumferð í júlí
Umferðin á höfuðborgarsvæðinu jókst svipað og á Hringvegi, í nýliðnum júlí, eða um 7,3%, milli áranna 2022 og 2023. Þessi aukning er rúmlega þrisvar sinnum meiri en í meðalári og varð til þess að nýtt met var sett í júlíumferð. En gamla júlí metið var frá árinu 2019.
Mest jókst umferð í mælisniði á Reykjanesbraut við Dalveg, eða um 8,4%, en minnst um mælisnið á Hafnarfjarðarvegi, eða um 4,5%.
Frá áramótum
Nú hefur umferðin um lykilmælisniðin þrjú á höfuðborgarsvæðinu aukist um 5,5%, frá áramótum, m.v. sama tíma á síðasta ári. Á sama tíma á síðasta ári hafði umferðin aukist um 1,1% m.v. árið þar áður.
Umferð eftir vikudögum
Í júlí jókst umferð á öllum vikudögum, m.v. sama mánuð á síðasta ári, en mest á sunnudögum, eða 9,4%. Minnst jókst umferð á föstudögum eða 5,0%.
Mest var ekið á föstudögum og minnst á sunnudögum, í júlí.
Horfur út árið 2023
Nú stefnir í að umferðin á höfuðborgarsvæðinu geti aukist um 4,5%, m.v. árið 2022. Gangi þessi spá eftir verður sett nýtt met í heildarumferð yfir umrædd mælisnið.
