Lenging til vinstri
Vinstribeygju akreinar á fjölförnum götum lengdar
Vegfarendur um Sæbraut hafa eflaust orðið varir við framkvæmdir sem þar standa nú yfir. Unnið er að því að lengja vinstribeygju akrein á Sæbraut inn á Skeiðarvog úr 90 metrum í 180 metra í þeim tilgangi að bæta umferðaröryggi og umferðarflæði á þessum slóðum. Núverandi beygjuakrein hefur verið lokað að hluta vegna þessara framkvæmda.
Nokkrir ljósastaurar hafa verið teknir niður vegna framkvæmdanna en þeir verða settir upp aftur í lok verks. Þá verður rafmagnsskápur færður og settir upp skynjarar fyrir umferðarljós.
Búast má við lítilsháttar töfum meðan á framkvæmdum stendur. Mikill umferðarþungi er á þessu svæði og eru vegfarendur beðnir um að sýna tillitssemi. Ljúka á verkinu fyrir lok júlímánaðar.
Framkvæmdir við Reykjanesbraut-Bústaðaveg á lokametrunum
Þá er vinnu við lengingu vinstribeygju akrein af Reykjanesbraut inn á Bústaðaveg að ljúka. Þar hefur eystri akrein Reykjanesbrautar verið breikkuð og vinstribeygju akreinin lengd úr 110 metrum í 220 metra til þess að bæta umferðaröryggi og -flæði.
D.Ing verk ehf. annast þessar framkvæmdir fyrir Vegagerðina.
