Rannsóknir á sjávarbotni Fossvogs
Undirbúningur vegna Öldu - brúar yfir Fossvog
Rannsóknir á sjávarbotni Fossvogs hafa staðið yfir frá því snemma í vor. Boraðar verða samtals 32 rannsóknarholur á fyrirhuguðu brúarstæði Öldu – brúar yfir Fossvog, sem er hluti af fyrsta áfanga uppbyggingar vegna Borgarlínu.
Burðarhæfi jarðlaga, dýpt niður á klöpp, jarðtæknilegir eiginleikar jarðefna með tilliti til stæðni og sigeiginleikar er á meðal þess sem verður rannsakað. Tækjabúnaður og mannskapur sem vinnur verkið kemur frá Vegagerðinni.
Friðrik Þór Halldórsson, rannsóknarmaður hjá Vegagerðinni, er einn þeirra sem koma að þessum rannsóknum. „Við borum niður í sjávarbotninn, þar sem fyrirhugað brúarstæði er. Við skoðum meðal annars hvernig botninn er og hversu mikið laust set er niður á klöppina, það er að segja setþykktina. Svo verða tekin óhreyfð sýni til að skoða efnasamsetningu setsins til að finna út hver styrkur þess er. Tekið verður svokallað þríásapróf til að mæla eiginleikana í efninu og hvernig það er samsett,“ segir hann.
Undirbúningur fyrir þessar rannsóknir hefur staðið yfir um alllangt skeið en auk Vegagerðarinnar koma Reykjavíkurborg, Kópavogur, Veitur og verkfræðistofan EFLA að þeim. Flytja þurfti og aftengja háspennustreng Veitna áður en hægt var að hefja rannsóknir á sjávarbotninum.
„Það er mörgu að hyggja. Einnig þarf að taka tillit til flugumferðar og þess vegna var byrjað Kópavogsmegin og þaðan verður farið yfir til Reykjavíkur,“ segir Friðrik Þór.
Einnig er búið að vera að vinna úr niðurstöðum jarðtæknirannsókna sem gerðar voru á síðasta ári vegna Borgarlínunnar.
Þessi grein birtist fyrst í Framkvæmdafréttum 3. tbl. 2023, nr. 725 . Áskrift að Framkvæmdafréttum er frí og hægt að gerast áskrifandi með því að senda póst á askrift@vegagerdin.is
