Skrifað undir samning um byggingu gatnamóta Reykjanesbrautar og Krýsuvíkurvegar
Framkvæmdir hefjast strax
Fulltrúar Loftorku, Suðurverks og Vegagerðarinnar skrifuðu undir verksamning um gerð mislægra gatnamóta Reykjanesbrautar og Krýsuvíkurvegar í dag 21. mars. Framkvæmdir hefjast strax enda á verkið að vinnast á skömmum tíma og vera lokið 1. nóvember næstkomandi. Í reynda eru verktakar þegar byrjaðir og hafa komið nú þegar upp vinnubúðum á svæðinu.
Sjá meira um verkið hér . Verkið er samstarfsverkefni Vegagerðarinnar, Hafnarfjarðar og veitufyrirtækja.
Byrjað verður á því að færa lagnir af ýmsu tagi og leggja framhjáhlaup áður en hafist verður handa við byggingu brúarinnar sjálfrar. Haldinn verður kynningarfundur síðdegis í dag kl 17:15 í sal á Norðurhellu. Farið verður yfir framkvæmdina og tímasetningar verksins.
VSÓ ráðgjöf ehf. sinnir eftirliti en þeir áttu lægst boð í það verk upp á 19, 4 milljónir króna, áætlaður verktakakostnaður var 21 milljón króna.
Sjálft verkið kostar mun meira, en Loftorka ehf., og Suðurverk ehf. áttu saman lægst boð upp á 918 milljónir króna en áætlaður verktakakostnaður var 817 milljónir króna. Við bætist síðan ýmist kostnaður við undirbúning og hönnun verksins.
