Áhugi á opnu hús bæði fyrir norðan og sunnan

Landsnet kynnti á sama tíma drög að matsáætlun vegna háspennulínu yfir Sprengisand. Það er ástæða þess að Vegagerðin leggur í þessa vinnu núna þar sem eðlilegt er að veglína vegarins sé ákveðin og valin á sama tíma og ákvarðanir eru teknar um háspennulínuna. Upplifun ferðamanna á þessari leið er nátengd háspennulínunni og mikilvægt að tengja það saman þannig til dæmis að vegfarendur um veginn verði sem minnst varir við línuna.

Gert er ráð fyrir Sprengisandsleið á skipulagi svæðisins og vegurinn er einn af stofnvegum í grunnneti, ein af fjórum skilgreindum hálendisleiðum og þarf Vegagerðin að hyggja að því sem öðru. Eigi að síður er leiðin ekki á samgönguáætlun og til hennar hefur ekki verið áætlað neitt fé og verður ólíklega farið í framkvæmdir fyrr en í fyrsta lagi eftir 10-15 ár.

Ferlið sem nú fer af stað er til þess að kalla fram athugasemdir frá almenningi og hagsmunaaðilum enda um að ræða val á veglínu. Umfang vegarins, breidd og upphækkun í landi og fleiri tæknileg atriði verða einnig til umræðu og ákvörðunar síðar meir í ferlinu.

Eðlilega er skoðanir skiptar á verkefni sem þessu en nú gefst almenningi tækifæri til að skila inn athugasemdum vegna þessara draga að matsáætlun og er fresturinn til 20. nóvember. Sjá hér drögin og netföng til að skila inn athugasemdum.

Fjöldi athugasemda og ábendinga ýmisskonar barst á opna húsinu. Fyrir norðan sáu menn ýmis tækifæri með greiðari og auðveldari samgöngum meðal annars varðandi ferðaþjónustuna. Skoðanir voru frekar skiptar á Hellu hvort rétt væri að leggja veg af þessu tagi um Sprengisand. Þótt ekki sé fyrirhugað að fara í þessar framkvæmdir á þessum tímapunkti er þó mikilvægt að fyrir liggi ákvörðun um veglínu til framtíðar.