Fréttir
Færri fara um Hellisheiði í júlí
Nokkuð minni umferð um Hellisheiði en aðeins meiri um Hvalfjarðargöng
Nokkuð færri hafa það sem af er júlí farið um Hellisheiði en á sama tímabili í fyrra, aðeins meiri umferð hefur hinsvegar verið um Hvalfjarðargöng.
Hellisheiði
Talsvert minni umferð var um Hellisheiði fyrstu tvær vikurnar í júlí borin saman við sömu vikur í júlí árið 2012, eða sem nemur 7,3%.
Virðist samdrátturinn aðallega vera vegna minni umferðar um helgar og á föstudögum. Mun minni samdráttur er á öðrum vikudögum, samanber stöplaritið hér fyrir neðan.
Umferðin hefur að meðaltali dregist saman um tæp 13% um helgar, að meðtöldum föstudögum, en 1,5% á öðrum dögum.
Það sem af er sumri eða frá 1. júní er samdrátturinn hins vegar um 1,3%.
Hvalfjörður
Aðeins meiri umferð er aftur á móti um Hvalfjarðargöng fyrstu tvær vikurnar í júlí borin saman við sömu vikur árið 2012 eða tæplega hálfu prósentustigi meiri.
Ólíkt Hellisheiði virðist sá vöxtur fyrst og fremst verða til á virkum dögum, að frátöldum föstudögum.
Umferðin hefur að meðaltali dregist saman um 1,3% um helgar og föstudögum en aukist um 2,1% á virkum dögum.
Það sem af er sumri eða frá 1. júní, hefur umferðin aukist um tæplega 1,5%.
