Ívið minni umferð árið 2012
en mun minni samdráttur en árin á undan
Umferðin á Hringveginum allt árið 2012 reyndist 0,4 prósentum minni en árið 2011, sé tekið mið af 16 lykilteljurum Vegagerðarinnar. Þetta er mun minni samdráttur en árin á undan. Árið 2011 dróst umferðin saman um 5,3 prósent og um 2,3 prósent árið 2010. Aukning var um 0,9 prósent 2009 en samdráttur upp á 1,7 prósent árið 2008. þar áður mældist gjarnan 5-6 prósenta aukning.
Í desember í fyrra jókst umferðin á Hringveginum um 5,7 prósent en í desember fyrir rúmu ári dróst umferðin mikið saman.
Umferðin árið 2012 liggur á milli árranna 2005 og 2006.
Milli desembermánaða 2011 og 2012
Umferðin í desember 2012, varð svo að segja jafn mikil og áætlanir Vegagerðarinnar gerðu ráð fyrir samanber síðustu frétt af umferð á Hringveginum. Gert hafði verið ráð fyrir 5,3% aukningu en hún varð 5,7% milli desembermánaða 2011 og 2012.
Aukning varð á Hringveginum á þremur landssvæðum af fimm, eða á Suðurlandi um 11,9%, um og við höfuðborgarsvæðið um 6,5% og á Vesturlandi um 3,8%. Samdráttur varð í umferð um Norðurland um 6,1% og Austurland um 2,5%
Milli áranna 2011 og 2012
16 lykilteljarar á Hringvegi gefa þá niðurstöðu að umferðin á Hringveginum hafi dregist saman um 0,4%, í heildina árið 2012.
Umferð jókst á Suðurlandi um 0,9%, á og við höfuðborgarsvæðið um 0,8% og á Austurlandi um 5,4%.
Umferð dróst saman á Vesturlandi um 3,5% og á Norðurlandi um 4,1%.
Áætluð heildarakstursbreyting milli áranna 2011 og 2012, verður birt síðar með umferðartölum yfir þrjú mælisnið á höfuðborgarsvæðinu.
