Sama umferð á Hringvegi og árið 2005
enn er samdráttur í umferðinni
Umferðin í apríl reyndist um 1,6 prósentum minni í apríl en í sama mánuði í fyrra á 16 völdum talningarstöðum á Hringveginum. Frá áramótum hefur umferðin dregist svipað saman. ´
Umferðin í ár stefnir því í það að verða sú sama og árið 2005 samkvæmt spálíkani Vegagerðarinnar. Ekki er að sjá samdrátt á höfuðborgarsvæðinu árið 2012 (spáin fyrir þrjú mælisnið) en þær tölur verða birtar á morgun.
Milli mánaða 2011 og 2012:Umferðin reyndist að jafnaði 1,6% minni í nýliðnum apríl mánuði miðað við sama mánuð árið 2011. Helgast það af því að umferð dróst saman á þremur svæðum af 5 eða í nágrenni höfuðborgarsvæðisins, á Norðurlandi og á Austurlandi.
Mest dregst umferðin saman á Norðurlandi eða um heil 8% meðan samsvarandi aukning varð á Suðurlandi eða rúmlega 7%.
Frá einstaka stöðum jókst umferð um Hellisheiði um 5,6% og í Hvalfjarðargöngum um 2%.
Það vekur hins vegar athygli hversu mikið umferð dregst saman á Geithálsi eða 17,6%, sem jafnframt er það mesta á einstaka stað.
Frá áramótum milli áranna 2011 og 2012
Umferð hefur dregist saman um 1,7% frá áramótum miðað við samsvarandi tímabil árið 2011.
Mest hefur umferð dregist saman yfir teljarasnið á Norðurlandi eða um 2,7%.
Umferð hefur aðeins aukist á einu svæði frá áramótum að telja miðað við samsvarandi tímabil árið 2011 eða á Austurlandi, þar sem hún hefur aukist um 4,3%.
Sjá nánar, meðfylgjandi töflu og talnaefni:
Nýtt stöplarit fylgir að þessu sinni (sjá líka mynd) en þar er hægt að sjá hversu hlutfallslega mikil umferð fer fram í einstaka mánuðum ársins yfir árið, frá 2005.
Dæmi um aflestur af stöplariti: Þá er að hægt er lesa það út að jafnaði fer einungis um 5,5% umferðarinnar fram í janúar, sem er minnstur, meðan í júlí er þetta sama hlutfall orðið um 12,5%, þegar mesta umferðin fer fram. Ágúst er u.þ.b. hálfu prósenti hærri en júní með 11,5% hlutfall ársins. Hlutfallslega hafa mestu sveiflurnar milli ára orðið í mars og júlí.
Athugið fyrirvara á tölum fyrir 2012, tölum þar sem einungis er um grófrýnd gögn að ræða, sem gætu tekið breytingum við endanlega yfirferð að loknu þessu ári.