Fréttir
Mikill áhugi á forvali Dýrafjarðarganga
Sjö aðilar sendu inn gögn
Alls sendu sjö aðilar inn gögn vegna forvals útboðs Dýrafjarðarganga. Fjórir aðilar sem hafa grafið göng á Íslandi eða vinna við það núna og síðan þrír aðilar sem ekki hafa áður unnið við gangagerð hér á landi. Ljóst er þá að áhuginn er mikill að þessu sinni en aðilar koma frá Danmörku, Tékklandi, Sviss, Noregi, Portúgal, Spáni og frá Ítalíu, auk Íslands. Þar af eru fjórir með innlenda samstarfsaðila líkt og þeir hafa gert hingað til. Nú verður farið yfir gögn og niðurstaða um hverjir geta boðið ætti að liggja fyrir eftir um þrjár vikur.Dýrafjarðargöng
forval
Forval var auglýst í byrjun maí og áttu þeir
verktakar sem hefðu áhuga á að taka þátt í útboðinu að skila inn gögnum 28. júní. Sjö aðilar sendu inn gögn, þar á meðal eru
þeir fjórir aðilar sem hafa verið að grafa göng á Íslandi undanfarin ár.
- ÍSTAK hf. og Aarsleff frá Danmörku, Ístak gróf síðast göng á
Íslandi við Búðarhálsvirkjun.
- Metrostav a.s. frá Tékklandi og
Suðurverk hf. , en þeir eru að vinna við
Norðfjarðargöng.
- ÍAV hf. og Marti
Contractors Ltd, frá Sviss, sem eru í Vaðlaheiðargöngum og að hefja vinnu við
stækkun Búrfellsvirkjunar.
- LNS
SAGA og Leonhard Nilsen og sönner frá Noregi, sem eru að grafa göng undir
Húsavíkurhöfða.
Síðan eru þrír aðrir aðilar
- Mt Höjgaard, danskt fyrirtæki sem
nýlega hefur sett hefur sett upp útibú á Íslandi, ásamt EPOS S.A. frá Portúgal.
- C.M.C
di Ravenna, frá Ítalíu.
- Aldesa
Construcciones, frá Spáni.
Vegagerðin mun nú fara yfir innsend gögn og athuga hvort umsækjendur uppfylli sett skilyrði. Eftir um þrjár vikur veður gefinn út listi yfir þá verktakahópa sem valdir verða til að taka þátt í væntanlegu útboði. Heimilt er að takmarka fjöldann við fimm, ef fleiri uppfylla öll skilyrði og teljast hæfir.
