Mikil breyting á Snæfellsnesi, aukin vetrarumferð
reikna má með að aukning ferðamennsku að vetri til sé ástæðan
Umferðin um mælipunkt Vegagerðarinnar við Eiðhús á Snæfellsvegi hefur nú árið 2016 aukist um 26 prósent frá árinu 2015 fyrstu mánuði ársins, eða frá janúar og út maí. Sé litið lengra aftur í tímann nemur aukningin um 40 prósentum. Leiða má líkur að því að aukin vetrarferðamennska erlendra ferðamanna skýri þessa miklu aukningu, að Snæfellsnes sé í heppilegri, þannig séð, fjarlægð frá höfuðborginni þar sem langflestir erlendir ferðamenn hefja dvöl sína.
Sama á reyndar við um Hringveginn sunnan Vatnajökuls þar sem mikil aukning hefur mælst í umferðinni í vetur, þar sem umferðin jókst um heil 83 prósent í mars sl.
Eins og áður hefur komið fram hefur umferðin verið að aukast mikið á Hringveginum. Sjá frétt af umferðinni á Hringveginum í maí. Þessi mikla aukning nær einnig til annara vega svo sem Snæfellsvegar við Eiðshús.
Þegar meðalumferðin frá árinu 2003 - 2016 er skoðuð fyrir fimm fyrstu mánuði hvers árs, sést að miklar breytingar hafa átt sér stað, mikil aukning í umferðinni á þessum stað.
Á fimm mánaða tímabili, í upphafi hvers árs, vex umferðin árlega um 4% á ári milli áranna 2011 - 2015 en hefur nú vaxið um 26% milli áranna 2015 og 2016 fyrir sama tímabil. Þannig að hér virðist aukningin ekki einvörðungu byggjast á mikilli sumarumferð.
