Enn mikil aukning í umferðinni
Umferðin á Hringveginum jókst um tæp átta prósent í ágúst
Enn heldur umferðin á Hringveginum áfram að aukast mjög mikið. Umferðin í ágúst á Hringveginum jókst um tæp átta prósent sem er gríðarlega mikil aukning. Samt ekki eins mikil og í fyrra þegar umferðin jókst um 13 prósent milli ára. Nú fara meira en 100 þúsund bílar um 16 lykilteljara Vegagerðarinnar á degi hverjum á Hringveginum.
Það stefnir í að umferðin í ár gæti aukist um 10 prósent.
Milli mánaða 2016 og 2017
Umferðin jókst um 7,9% í ágúst miðað við sama mánuð á síðasta
ári. Mest jókst umferðin um mælisnið á Suðurlandi eða um tæp 15% en minnst jókst
umferðin um Vesturland eða um 5,4%.
Þetta er talsvert mikil aukning en hún er þó tæplega helmingi minni en á síðasta ári þegar umferðin jókst um 13% milli ágúst 2016 og 2015.
Hvað einstaka mælisnið varðar þá jókst umferðin mest um mælisnið á Mýrdalssandi en minnst um mælisnið á Mývatnsheiði eða um 2,4%.
Aldrei hafa jafn mörg ökutæki mælst í ágúst á Hringveginum en samanlögð meðalumferð hvern dag fór í fyrsta sinn yfir 100 þúsund bíla markið og gott betur en að jafnaði fóru tæplega 105 þús. ökutæki á sólarhring um mælisniðin 16.
Nú hefur umferðin aukist að jafnaði um 3,8%, frá árinu 2005, en síðustu 5 ár hefur aukningin verið um 7%.
Milli áranna 2016 og 2017, frá áramótum
Umferðin hefur nú aukist um 10,9% það sem af er ári miðað við sama
tímabil á síðasta ári. Þetta er gríðarleg aukning og aðeins einu sinni áður (frá því að þessi samantekt hófst) hefur mælst
meiri aukning miðað við árstíma en það var á síðasta ári en þá var aukningin orðin
12,6%.
Það sem af er ári hefur umferðin aukist mest um Suðurland en minnst um Vesturland eða um 8,5%.
Umferð eftir vikudögum
Umferð hefur aukist mikið alla vikudaga en hlutfallslega
mest á þriðjudögum eða um 12,8% sem eru að jafnaði umferðarminnstu dagarnir. En
minnst hefur aukningin, það sem af er ári, verið á sunnudögum eða um 9,5%.
Umferðarmestu dagarnir eru að jafnaði föstudagar.
Horfur út árið 2017
Hegði umferðin sér líkt og undanfarin ár gæti umferðin
aukist um 10% að meðaltali yfir mælisniðin 16.
Ath. er vakin á eftirfarandi:
Öll gögn árið 2017 eru eingöngu grófrýnd og gætu því átt
eftir að breytast við endanlega yfirferð.
Mælisnið Vegagerðarinnar eru í heild yfir 300, á öllu þjóðvegakerfinu, hér er því aðeins um lítið brot til athugunar, sem notað er til að gefa vísbendingu um það sem er að gerast á Hringvegi.
