Umferðarþjónusta - Tilkynning - 26.7.2017
Tjörublæðingar í Norðurárdal
Vegfarendur eru varaðir við töluverðum tjörublæðingum í Norðurárdal í Borgarfirði en unnið er að úrbótum.
Malbikunarframkvæmdir á höfuðborgarsvæðinu
Á miðvikudagskvöld 26. júlí er stefnt að því að fræsa og malbika akreinar á Kringlumýrarbraut, frá gatnamótum við Háaleitisbraut í átt að Suðurlandsbraut. Annarri akreininni verður lokað á meðan, umferðarhraði lækkaður framhjá vinnusvæðinu og má búast við lítilsháttar umferðartöfum. Áætlað er að framkvæmdirnar standi yfir milli kl. 19:30 til kl. 01:00.
Einnig er stefnt að því að fræsa og malbika akrein á Miklubraut, frá gatnamótum við Grensásveg að gatnamótum við Kringlumýrabraut. Akreininni verður lokað á meðan, umferðarhraði lækkaður framhjá vinnusvæðinu og má búast við lítilsháttar umferðartöfum. Áætlað er að framkvæmdirnar standi yfir milli kl. 01:00 til kl. 06:00 aðfaranótt fimmtudagsins 27. júlí.
Á fimmtudagskvöldið 27. júlí og aðfaranótt 28. júlí er stefnt að því að malbika hringtorg á Reykjanesbraut við N1 í Hafnarfirði. Hringtorginu verður lokað á meðan framkvæmd stendur yfir og hjáleiðir settar upp. Umferðarhraði verður lækkaður framhjá vinnusvæðinu og má búast við lítilsháttar umferðartöfum. Áætlað er að framkvæmdirnar standi yfir milli kl. 21:00 til kl. 06:00.
Vegfarendur eru beðnir um að virða merkingar og hraðatakmarkanir og sýna aðgát við vinnusvæðin sem eru þröng og menn og tæki eru við vinnu mjög nálægt akbrautum.
Viðhaldsframkvæmdir
Vegagerðin
varar við töluverðum viðhaldsframkvæmdum á
Hringvegi frá Borgarnesi að Laugabakka í Miðfirði næstu daga. Vegfarendur geta búist við umferðarstýringu við framkvæmdasvæðið
með 10-15 mínútna bið í senn.
Einnig er unnið við blettanir í Dölunum.
Vegfarendur eru beðnir að aka varlega um nýlögð svæði, virða stöðvunarskyldu og hraðatakmarkanir á vinnusvæðum til að lágmarka umferðartafir og tjón vegna steinkasts.
Framkvæmdir á Reykjanesbraut og Krýsuvíkurvegi
Unnið er við mislæg vegamót Reykjanesbrautar og Krýsuvíkurvegar í Hafnarfirði. Umferð fer á kafla um hjáleið á Reykjanesbraut sunnan Hafnarfjarðar. Leyfður umferðarhraði þar er 50 km/klst. Vegna sprenginga þarf að stöðva umferð á Reykjanesbraut í skamman tíma, allt að þrisvar sinnum á dag.
Einnig er verið að byggja nýtt hringtorg á Krýsuvíkurvegi (42), en um er að ræða gatnatengingar að Dofrahellu og Ásvallabraut (Klukkutorg). Í upphafi verður unnið meðfram Krýsuvíkurvegi (42) og síðar í sumar verður umferð færð yfir á hjáleið við hlið framkvæmdasvæðis. Gert er ráð fyrir að hringtorgið verði tekið í notkun 1. september 2017.
Þar að auki er unnið að gerð tveggja hringtorga á Reykjanesbraut (41), annars vegar við Aðalgötu og hins vegar við Þjóðbraut. Ökuhraði er lækkaður á framkvæmdasvæðinu og búast má við einhverjum töfum. Verkinu á að ljúka í september.
Vaðlaheiðarvegur
Vaðlaheiðarvegur 832 hefur verið opnaður að hluta, þ.e. 12 km kafli upp úr Eyjafirði en vegna framkvæmda við Vaðlaheiðargöng í Fnjóskadal er ekki hægt að láta umferð fara um vinnusvæðið við Skóga, því er veginum lokað við Ytra Nesgil. Öll umferð upp úr Fnjóskadal er því bönnuð.
