Umferðarþjónusta - Tilkynning - 23.2.2018

Færð og aðstæður

Snjóþekja, hálka eða hálkublettir eru á Suð-vestanverðu landinu. Þæfingsfærð er á Kjósarskarði og Þingvallavegi en ófært á Lyngdalsheiði en þar er verið að moka. 

Á Vesturlandi er snjóþekja, hálka eða hálkublettir. Þæfingsfærð er á  milli Ólafsvíkur og Grundarfjarðar, í Svínadal og  á Bröttubrekku. Ófært er á Fróðárheiði.

Á Vestfjörðum er víða Snjóþekja, hálka eða hálkublettir. Þungfært er Steingrímsfjarðarheiði, Þröskulda og Hjallaháls en þæfingsfærð á Mikladal. Ófært er á Klettsháls. Verið er að moka flestar leiði og koma upplýsing inn síðar.

Það er hálka, hálkublettir eða snjóþekja á vegum á Norðurlandi vestra.

Á Norðaustur- og Austurlandi er víðast hvar greiðfært en hálkublettir yfir Mývatns- og Möðrudalsöræfi, Fagradal, Vatnsskarð eystra og Fjarðarheiði. Einnig er greiðfært með suðausturströndinni að Höfn en þar fyrir vestan eru hálkublettir eða hálka.

Skemmdir á slitlagi

Í því veðurfari sem hefur gengið yfir að undanförnu hefur mikið borið á slitlagsskemmdum á vegum. Á þessum árstíma er aðeins hægt að bregðast við með ófullkomnum bráðabirgðaviðgerðum og því eru vegfarendur beðnir að sýna sérstaka aðgát við þessar aðstæður.

Grjóthrun í Hvalnesskriðum

Vegna mikillar úrkomu hefur verið töluvert grjóthrun í Hvalnesskriðum og eru vegfarendur beðnir að fara varlega.

Vatnavextir í Fáskrúðsfirði

Vatn flæðir yfir veg á þremur stöðum í sunnanverðum Fáskrúðsfirði og eru vegfarendur beðnir að sýna aðgát og fara varlega.

Þungatakmarkanir

Vegna hættu á slitlagsskemmdum verður viðauki 1 felldur úr gildi og ásþungi miðaður við 10 tonn frá kl. 16:00 í dag, föstudag 23. febrúar á Snæfellsnesvegi 54 frá Borgarnesi og á öðrum vegum á Snæfellsnesi.

Viðauki 1 hefur verið felldur úr gildi á öllum vegum í Árnessýslu, Rangárvallasýslu og Vestur-Skaftafellssýslu nema á Hringvegi frá Reykjavík að Selfossi.